சுடுகாடுகளாய்…

மலையருவி

ராஜ குருக்களின்

ஆட்சியில்

கோரைப் பற்களை நீட்டி

மக்கள் குடல் கிழித்து

இரத்தம் குடிக்கும்

சிம்மாசனம்

 

உடைவாள் ஏந்திய

பெருமித்தில்

சித்தம் கலங்கி

சொந்த தேசத்து மக்களையே

வேட்டையாடும்

சிப்பாய்கள்

 

நர்த்தகிகளின்

நவரச

ஆட்டத்தில்

மெய்மறந்த சேனாதிபதிகள்

 

அறுசுவை விருந்தில்

போதை தலைக்கேறத்

தலைக்கறி கேட்கும்

தூதுவர்கள்

 

குடியிருப்புச் சுவர்களில்

காதுகளைப் புதைத்து

ஒட்டு கேட்கும்

ஒற்றர்கள்

 

தேசபக்த

கோட்சேக்களின்

பஜனைகளில்

மெய்மறக்கும் இராசமாதா

 

ராஜாதி ராஜ..

ராஜ மார்த்தாண்ட..

என்று நீட்டி முழக்கும்

ஊடக விதூஷகர்கள்

 

தர்பார் மண்டத்தில்

முதுகெலும்பு உடைந்த

தலையாட்டி பொம்மைகள்

 

இந்த

மகத்தான

ராஜ்ஜியத்தின்

எல்லைகள்

மேலும் மேலும் விரியும்

சுடுகாடுகளாய்…

(முனைவர் நா.இளங்கோ)

யுகங்கள் தோறும்…

யுகங்கள் தோறும்…

       -மலையருவி

யுகங்கள் தோறும்

அழிக்கவும் ஆக்கவும்

நானே அவதரிப்பேன்

எல்லா யுகங்களிலும்

நானே இருப்பேன்

நீங்கள் இருப்பதும் கரைவதும்

என் விருப்பப்படியே

எனக்கென்று

உருவம் இல்லை

எனக்குப் பகையும் இல்லை

நட்பும் இல்லை

என்னை நம்புகிறவன்

தன்னைக் காத்துக் கொள்வான்

நான்

எவரிடமிருந்தும்

எளிதில் விலகுவதில்லை

என்னுள் எல்லாம் அடக்கம்

என் சிற்றுரு

பலநூறு கோடிகளில்

பல்லுரு கொள்ளும்

நான்

தூணிலும் இருப்பேன்

துரும்பிலும் இருப்பேன்

எப்பொழுதும்

என்னை

நினைத்துக் கொண்டே இரு

நீ காண்பன

தொடுவன

நுகர்வன

அனைத்திலும்

நானே சூட்சமமாய் இருக்கிறேன்

எவனொருவன்

கைகழுவி

வாய்பொத்தித்

தனித்திருக்கிறானோ

அவனை விட்டு

விலகியே இருப்பேன்

என்னை விட்டு

நீங்குபவன்

மகிழ்ந்திருப்பான்..

நிலைத்திருப்பான்..

சர்வம் கிருமி மயம்..

கங்குகள் உயிர்க்கும்

மலையருவி

கல்லெறி, தீ வைப்பு

வன்முறை வெறியாட்டம்.

கையில் தடி

கண்களில் கொலைவெறி

மறைத்த முகங்களின்

முகவரி தொலையும்

ஆயுதம் எடுத்தவர்க்கும்

ஆயுதம் கொடுத்தவர்க்கும்

அதே ஆயுதம்தான்.

இரத்தப் பூஜையும்

பிணப் படையலும்

சாமிக்காகவா!

எதிர்க்குரல் கேட்கக்

கூசும் செவிகளை

முழக்கப் பேரொலி

ஈட்டியாய்ப் பிளக்கும்

எரியும் தீயடங்கி

பூக்கும் சாம்பலில்

கங்குகள் உயிர்க்கும்

-மலையருவி

முப்புரி நூல்

முனைவர் நா.இளங்கோ

கல்விக்கு
நூலோடு தொடர்புண்டு,
அது முப்புரி நூல்
என்கிறது மனு(அ)தர்மம்.

பாத்திமா லத்தீப்பின்
தூக்குக் கயிற்றில்
எத்தனை எத்தனை
முப்புரி நூல்களோ?

காலம் காலமாய்த் திரிக்கப்பட்டு
இறுகி கனத்து
இன்னும்
எத்தனை உயிர் வாங்கக்
காத்திருக்கின்றனவோ!

நூல்.. நூல்.. நூல்..

- மலையருவி.

பேச்சுவார்த்தை.

-மலையருவி (முனைவர் நா.இளங்கோ)

அன்றைக்கு,

நாக்கால் சொறிந்துகொள்ளும் சுகத்தில்

நீ தொலைத்துவிட்ட தன்னம்பிக்கை

தவறிப் போய்விடவில்லை.

அது

அவசரத்தில்

யார் வீட்டுத் தோட்டத்திலோ

புதையுண்டு போயிருக்கிறது.

சரி! பேசுவோம்.

நீயும் வா! அவனையும் கூப்பிடு!

பேசுவோம்,

பேசிப் பார்ப்போம்.

எல்லாமே,

பேசக்கூடிய விசயங்கள்தான்.

கூடிக் கூடிக்

கைகளை உயர்த்தாதே!

மூச்சில் அனலை ஏற்றாதே!

அது ஆபத்தின் அறிகுறி.

முகத்தில் வழியும்

இரத்தத்தைத் துடை!

கை கால்களை அசைக்காதே!

முனகலை நிறுத்து!

எல்லாமே,

பேசத் தீர்க்கக் கூடியதுதான்.

பேசாதே!

குரலை உயர்த்தாதே!

அது அதிகப் பிரசங்கித்தனம்.

தலையை ஆட்டு

மேலும்.. கீழுமாய்..

ஆகா! ஆகா!!

தீர்ந்தது பிரச்சனை.

எல்லாமே,

பேசத் தீர்க்கக் கூடியதுதான்.