கவர்ச்சித் தலைவர்கள் தேவை -மலையருவி

கவர்ச்சித் தலைவர்கள் தேவை

மலையருவி


தேவை
கவர்ச்சித் தலைவர்கள்

நாளை ஆட்சியைப் பிடிக்க
இன்று
அவசரத் தேவை
வாக்குகளை வாரிக் கட்டும்
கவர்ச்சித் தலைவர்கள்

முகமற்ற
முந்தைய தலைகளின்
முகவரிகள்
தொலைந்து போனதால்
புதிய தலைகள்
கவர்ச்சித் தலைகள்
கட்டாயம் வேண்டும்

பெருந்தலைவர்களின்
பெருங்காய டப்பாவையே
எத்தனை நாள்தான்
முகர்ந்து கிடப்பது

வசீகரமிக்க
வளப்பமான
வண்ண முகத்தோடு
தேவை
சில கவர்ச்சித் தலைகள்

வண்ணத்திரையின்
மின்னொளிகளில் மின்னும்
அட்டைக் கத்தித் தலைவர்கள்
அவசியம் வேண்டும்

நோட்டைக் குவிக்கும்
கோஷ்டித் தலைகள்
பேதங்களற்று
பெரிய மனதோடு
வலைகளை வீசிக் காத்திருக்க
கவர்ச்சித் தலைவர்கள்
கட்டாயம் சிக்குவர்

நாளைய வாக்குவங்கியாம்
இளைய தளபதிகளுக்கு
இன்முக வரவேற்பு

நாளை ஆட்சியைப் பிடிக்க
இன்று
அவசரத் தேவை
வாக்குகளை வாரிக் கட்டும்
கவர்ச்சித் தலைவர்கள்

வேடங்களின் பின்னே ஒரு வெற்றுமுகம் - மலையருவி

வேடங்களின் பின்னே ஒரு வெற்றுமுகம்

வேடங்கள் பொய்யெனில்
வேடம் புனைந்த
வேலன் பொய்யா?
வேலன் புனைந்த
வேந்தன் பொய்யா?

புனைகளின் புலம்பலில்
வேந்தன் வெல்கிறான்
வேலன் தோற்கிறான்

வேடம் புனைந்து
வினைகள் ஆற்றிட
வேடம் வெல்லுமோ?
வினைகள் வெல்லுமோ?

வேடங்களின் பின்னே
ஒரு வெற்றுமுகம்
வேதனைப் படுவதென்ன
வேடிக்கையா?

தொலைவது என் வாடிக்கை - மலையருவி

தொலைவது என் வாடிக்கை
மலையருவி

எனது நாட்குறிப்பேட்டில்
சில பக்கங்கள் குறைகின்றன

வாழ்ந்த தாள்களில்
வாடிக்கை தவிர
வேடிக்கை ஒன்றுமில்லை

வரைந்த நாட்களில்
தேய்ந்தவை தவிரத்
தேர்ந்தவை ஒன்றுமில்லை

நாட்குறிப்பேட்டின்
நமுத்துப்போன பக்கங்களில்
நானே தெரிகிறேன்
நானாகத் தெரிகிறேன்

குறைந்த பக்கங்களைக்
கூட்டிக் கழித்துக்
குழம்பித் தெளிந்து
தெளிவைக் குழப்பித்
தேடிப் பார்க்கிறேன்
தேதிகள் இழப்பில்லை

சில பக்கங்கள் குறைகின்றன – ஆனால்
தேதிகள் குறைந்ததில்லை.

சிரிக்கப் பழகுங்கள்

சிரிக்கப் பழகுங்கள்
மலையருவி

பகல் இரவு
இரண்டு நேரங்களில் மட்டும்
மின்சாரம் தடைபடலாம்

வந்து வந்தும் போகலாம்
வராமலும் போகலாம்

மின்சார வாழ்க்கை
செயற்கையானது
இயற்கையை நோக்கித் திரும்புவோம்

சிறுதொழில்கள்
மின்சாரமின்றி நலிவடைகின்றதா?
உலக முதலாளிகளும்
பன்னாட்டு நிறுவனங்களும்
இருக்கும்போது
நம்மூர்த் தொழில்கள் எதற்கு?

சாதாரண குடிமக்கள்
மின்சாரமின்றி பழகிக்கொள்வது நல்லது
அது
நம் மூதாதையர்களுக்கு
நாம்காட்டும் மரியாதை

வாகனங்கள் வைத்திருக்கின்றீர்களா?
நடப்பது நல்லது
காலை மாலை மட்டுமல்ல
எப்பொழுதுமே நடப்பது நல்லது

வாகனங்களைத் தள்ளிக்கொண்டே
நடந்து பழகினால்
நானூறு ஆண்டுகள்
நலமாக வாழலாம்

பெட்ரோல் பங்குகளில்
வாகனங்களின் துணையோடு
முண்டியடித்து
வரிசையென்ற ஒன்றில்லாத
வரிசைகளில் நிற்கப் பழகிக்கொண்டால்
வருங்காலம் பிரகாசமாகும்

சிரிக்கப் பழகுங்கள்
அட சும்மா!
சிரிச்சித்தான் பழகுங்களேன்.

அணுசக்தி ஒப்பந்தம்!

அணுசக்தி ஒப்பந்தம்!

மலையருவி

நல்ல காலம் பொறக்குது!
நல்ல காலம் பொறக்குது

நாளைக்கே இந்தியா ஒளிவீசப் போகுது

புண்ணியவான்! சாமி!
புஷ் மனசு வச்சிட்டாரு!

அணுசக்தி ஒப்பந்தம்
அமெரிக்க ஒப்பந்தம்

நல்லா நடந்துதுன்னா
நாடே செழிச்சிப்புடும்

வல்லரசா இந்தியாவும்
வளைச்சிப் போடும் ஆசியாவ

ஏழை இந்தியா எங்கியோ போயிடும்

மக்குகளா!
குஜராத் ஒரிசா
மதக்கலவர மெல்லாம்
மறந்தே போயிடும்
மறந்தே போயிடும்

விஷம்போல ஏறிவரும்
வெலவாசி நிலைமையெல்லாம்
வேடிக்கபோல
வெளயாட்டா ஆயிடும்
வெளயாட்டா ஆயிடும்

எல்லாமே மாறிடும்
எல்லாமே மாறிடும்

அய்யாசாமி! கேட்டிட்டு
அப்படியே போனா எப்படி?

வயித்துக்கு வழியில்ல சாமி
நாலணாவோ! ஏட்டணாவோ!
போட்டுட்டுப் போணா
புண்ணியமாப் போவும்

நல்ல காலம் பொறக்குது!
நல்ல காலம் பொறக்குது

கோரிக்கைகள்

கோரிக்கைகள் - மலையருவி

கவிதை எழுதினோம்

கரங்களை உயர்த்தி
முழக்கங்கள் இட்டோம்

கருப்புக் கொடியணிந்து
கண்டனம் தெரிவித்தோம்

ஆர்ப்பாட்டம், தர்ணா, பட்டினிப் போர்
உள்ளரங்கக் கூட்டம்,
வாயில் கூட்டம்
தெருமுனை முழுக்கம்

அரசு ஊழியராய்
வேறென்ன செய்ய?

புதிய அமைச்சர்
பதவியேற்றுள்ளார்
சால்வை அணிவித்து
படமெடுத்துக்கொள்ளலாம்.

கோரிக்கைகள்?

நேற்று இன்று நாளை ---மலையருவி

நேற்று இன்று நாளை

நேற்றைய பொழுது
எப்போது முடிந்தது?
இன்றைய தொடக்கம்
எந்தக் கணத்தில்?
நாளைய தினத்தின்
வரவு அறிவேனோ?

இரவில் தூங்கிப்
பகலில் விழிக்கும்
உறக்கம் தொலைந்த
பொழுதுகளில்

உள்ளும் வெளியுமாய்
எல்லை வகுக்கும்
இருப்பிட இயக்கம்
துறந்த
தருணங்களில்

விளிம்புகள் அற்ற
வெளிகளில் சுற்றிய
முடிவறியாத
காலங்களில்

நேற்றைய பொழுது
எப்போது முடிந்தது?
இன்றைய தொடக்கம்
எந்தக் கணத்தில்?
நாளைய தினத்தின்
வரவு அறிவேனோ?